സ്​കൂൾ പ്രവേശനോത്സവം വിർച്വലായി​ നടത്തും, തുടക്കത്തിൽ റിവിഷൻ ക്ലാസെന്നും വിദ്യഭ്യാസമന്ത്രി

തിരുവനന്തപുരം: സ്​കൂൾ പ്രവേശനോത്സവം ഓൺലൈനായി​ നടത്തുമെന്ന്​ വിദ്യഭ്യാസമന്ത്രി വി.ശിവൻ കുട്ടി വാർത്താസമ്മേളനത്തിൽ അറിയിച്ചു. ജൂൺ ഒന്നിന്​ സംസ്ഥാനതല ഉദ്​ഘാടനം തിരുവനന്തപുരം കോട്ടൺ ഹിൽ സ്​കൂളിൽ നടക്കും. മുഖ്യമന്ത്രി പിണറായി വിജയൻ, വിദ്യഭ്യാസ മന്ത്രി എന്നിവർ പ​ങ്കെടുക്കും. രണ്ട്​ തലങ്ങളിലായാണ്​ പ്രവേശനോത്സവം നടക്കുക. 9 മണിക്ക്​ മുഖ്യമന്ത്രി വിക്ടേഴ്​സ്​ ചാനൽ വഴി ഉദ്​ഘാടനം നിർവഹിക്കും. 11 മണിക്ക്​ വിർച്വലായി സ്​കൂളുകളിൽ പ്രവേശനോത്സവം നടക്കും. തുടക്കത്തിൽ ഡിജിറ്റൽ ക്ലാസും തുടർന്ന്​ സംവാദ രീതിയിലും ക്ലാസ്​ നടത്താൻ ആലോചനയുണ്ട്​. തുടക്കത്തിൽ ഡിജിറ്റലായി റിവിഷൻ ക്ലാസുകൾ സംഘടിപ്പിക്കും.

എസ്​.എസ്​.എൽ.സി മൂല്യ നിർണയം ജൂൺ ഏഴ്​ മുതൽ 25 വരെ നടക്കും. ഹയർസെക്കണ്ടറി - വി.എച്ച്​.എസ്​.ഇ മൂല്യ നിർണയം ജൂൺ ഒന്ന്​ മുതൽ 19 വരെ നടക്കും. പ്രാക്​ടിക്കൽ പരീക്ഷ ജൂൺ 21 മുതൽ ജൂലൈ ഏഴ്​ വരെ നടക്കും. പ്ലസ്​ വൺ പരീക്ഷയുടെ അന്തിമ തീരുമാനം മുഖ്യമന്ത്രിയെടുക്കുമെന്നും അദ്ദേഹം പറഞ്ഞു.

ശനിയാഴ്ച തിരുവനന്തപുരം മണക്കാട്​ സ്​കൂളുകളിൽ വെച്ച്​ പാഠപുസ്​തകവിതരണത്തിന്‍റെ ഉദ്​ഘാടനം നടക്കും. ഒന്നാം ഭാഗത്തിന്‍റെ 70 ശതമാനം പാഠപുസ്​തക വിതരണം പൂർത്തിയായി. ഡിജിറ്റൽ ഉപകരണങ്ങൾ വിദ്യാർഥികൾക്ക്​ ലഭിക്കാൻ എല്ലാവരും സഹായിക്കണമെന്നും മന്ത്രി അറിയിച്ചു.